पारस डिभिजन टु को सर्वोत्कृष्ट खेलाडी

पारस डिभिजन टु को सर्वोत्कृष्ट खेलाडी

Posted by Nepal News on Sunday, January 25, 2015 0

काठमाडौं । नेपाली क्रिकेट टोलीका कप्तान पारस खड्का आईसीसी विश्व क्रिकेट लिग डिभिजन टु प्रतियोगिताका सर्वोत्कृष्ट खेलाडी बनेका छन् । 

नामिबियामा शनिबार सम्पन्न प्रतियोगितामा नेपाल चौथो स्थानमा समेटिएपनि पारस खड्का प्रतियोगिताको उत्कृष्ट खेलाडी चुनिए । 

क्यानाडा र नामिबिया विरुद्धका खेलमा लगातार म्यान अफ द म्याच घोषित भएका पारस प्रतियोगिता अवधिभर ८ अंक जोड्दै उत्कृष्ट खेलाडी बनेका हुन् ।

प्रतियोगिता अन्तर्गत तेस्रो स्थानका लागि शनिबार भएको खेलमा केन्यासंग १५ रनले पराजित हुँदै नेपाल चौथो भएको छ । 

अघिल्लो दिन केन्यासंगै ५ विकेटले हारेर डिभिजन वानमा पुग्न नसकेको नेपाललाई केन्याले २४ घण्टाभित्र दोस्रो पटक पराजित गरेको हो । 

दुई सय नौ रनको चुनौती पछ्याउने क्रममा नेपालले ४७ ओभरमै अलआउट हुँदै एक सय ९३ रनमात्र जोड्न सक्यो । 

विनोद भण्डारी र उपकप्तान ज्ञानेन्द्र मल्लले चौथो विकेटका लागि एक सय सात रनको कीर्तिमानी साझेदारी गर्ने क्रममा क्रमशः ७३ र ४८ रन बनाए पनि अन्य ब्याट्सम्यान टिक्न नसक्दा नेपाल पराजित भएको हो ।