आज श्रीपञ्चमी

आज श्रीपञ्चमी

Posted by Nepal News on Sunday, January 25, 2015 0

काठमाडौं । आज माघ शुक्ल पञ्चमी अर्थात श्री पञ्चमी । विद्याकी देवी सरस्वतीको पुजा आराधना गरी मनाइदै छ । शुभ कार्य गर्न आजका दिन साइत हेर्न नपर्ने पवित्र दिनको रुपमा समेत लिइन्छ । 

विशेषगरी विद्यार्थी, शिक्षक, साहित्यकार, कलाकार, पत्रकारहरुले आ–आफ्ना कलासाधनाका उपादानहरु कापी–कलम, वाद्ययन्त्र, कुचीलगायत सामग्रीको श्रद्धापूर्वक पूजा गर्दछन् । विभिन्न सरस्वती मन्दिरहरुमा आज विहानैदेखि विद्यार्थीहरु विद्याकी देवी सरस्वतीको पूजा प्रार्थना गर्न लाम लागेका छन् । 

आज काठमाडौको हनुमानढोकास्थित नासलचोकमा पुरोहितबाट बिधिपूर्वक कथा बाचन गरि वसन्त श्रवण गर्ने प्रचलन पनि छ । काठमाडौंको स्वयम्भुमा रहेको सरस्वती मन्दिरसहित देशभरका सरस्वती मन्दिरमा पूजा गर्न विहानैदेखि सर्वसाधरण र विद्यार्थीको भीड लागेको छ । 

मन्दिर पाठशाला तथा घरमा सरस्वतीको पूजा आराधना गर्नाले विद्या प्राप्ति हुने विश्वास रहेको छ । अक्षराम्भ गर्ने नानीहरुका लागि आजको दिन बिशेष मानिन्छ । आजबाट शिशिर ऋतुको समाप्ति र वसन्त ऋृतुको सुरुवात हुने गर्दछ ।