इन्डियन सुपर लिगको उपाधि गांगुलीको टिम एट्लेटिको डी कोलकातालाई

इन्डियन सुपर लिगको उपाधि गांगुलीको टिम एट्लेटिको डी कोलकातालाई

Posted by Nepal News on Sunday, December 21, 2014 0

एजेन्सी । क्रिकेटर शौरभ गांगुलीको फुटबल टिम एट्लेटिको डी कोलकाता इन्डियन सुपर लिगको च्याम्पियन बनेको छ । शनिबार राति मुम्बइस्थित डी वाई पाटिल स्टेडियममा भएको फाइनल खेलमा क्रिकेटका बादशाह सचिन तेन्दुल्करको टिम केरला ब्लास्टर्सलाई १÷० ले पराजित गर्दै गांगुलीको टिम कोलकाता सुपर लिगको पहिलो संस्करण विजेता बनेको हो ।

निर्धारित ९० मिनेटसम्म गोल रहित बराबरीको अवस्थामा कोलकाताका सफ्टिच्युट खेलाडी मोहम्मद रफिकले इन्जुरी समयमा निर्णायक गोल गर्दै टिमलाई विजेता बनाए । खेलको ७४ औँ मिनेटमा मैदान प्रवेश गरेका रफिक कोलकाताका लागि वरदान सावित भए । 

खेलको इन्जुरी समयमा कोलकाताले कर्नर पाएपछि ज्याकब पोडानीको कर्नर किकलाई रफिकले गोल पोष्टको जाली चुमाएका हुन् । पुरै खेल अवधिभर केरलाले कोलकाता माथि दबाब राखेपनि कोलकाताका गोलकिपर इडेल बेतेको उत्कृष्ट प्रदर्शनका कारण केरलाले हार टार्न सकेन । 

जितसँगै कोलकाताले आठ करोड रुपैयाँ पुरस्कार प्राप्त गरेको छ भने केरला ब्लास्टर्सले चार करोड रुपैयाँमा चित्त बुझायो । पहिलोपटक आयोजना भएको ईन्डियन सुपर लिग फुटबलको उपाधि भारतीय फुटबलको परम्परागत शक्ति स्थल कोलकाता भित्रिएको हो । भारतीय फुटबलको ईतिहासमा कोलकाताका क्लबहरु ईष्ट बेंगाल र मोहन बगान सबैभन्दा सफल मानिन्छन् । 

फाइनल खेल हेर्न दुवै टिमका प्रर्वधक सचिन तेन्दुलकर, शौरभ गांगुलीका साथै क्रिकेटर हरभजन सिंह, टेनिस स्टार लिएन्डर पेस, चेन्नइयिन एफसीका लगानीकर्ता मध्येका एक तथा अभिनेता अभिषेक बच्चनलगायतको उपस्थिति रहेको थियो ।